O BNG levará ao Parlamento Galego os incumprimentos coa Lei de Normalización Lingüística por parte da Fundación de Exposición e Congresos da Estrada


A edición do cartaz e o dossier promocional deste ano é a pinga que colma o vaso dunha actuación chapuceira da Fundación co noso idioma

cartaz-feiradomobleO BNG anuncia que levará ao Parlamento Galego o incumprimento da Lei de Normalización Lingüística por parte da Fundación de Exposicións e Congresos da Estrada. Segundo os nacionalistas, “a pinga que colma o vaso é a edición dun cartaz e un dossier en perfecto castelán, polo que reclaman a súa retirada inmediata e a edición duns novos elementos promocionais”.

Segundo explica o BNG, non é a primeira vez que a Fundación incumpre as obrigas legais que ten co noso idioma “non hai máis que botar unha ollada á web desta entidade (www.feiradomoble.com) para ver que estamos diante dunha chapuza considerábel, onde si hai partes en galego, pero predomina o castelán”. “De feito,” engaden os nacionalistas, “a web ten un aplicativo de Google que permite traducir a web a varios idiomas entre os que se atopan o “catalán, español, vasco, francés, inglés, italiano e portugués”, pero o galego só aparece se se escolle previamente algún dos mencionados.”

“Por outra parte,” explican desde o BNG, “este aplicativo de Google non só ten este fallo, senón que as traducións automáticas deste servizo deixan bastante que desexar, dando unha pésima imaxe da Feira do Moble e do noso concello”.

O BNG non ten representación no padroado da Fundación e Exposicións e Congresos da Estrada, onde só teñen presenza o PP e o PSOE da localidade, que está presidido polo conselleiro de industria. “É evidente que a estas dúas organizacións non lles importa para nada o noso idioma, senón non chegaríamos a esta situación”, afirmaron os nacionalistas. “Polo tanto”, engaden, “levaremos esta situación de desprezo polo noso idioma ao Parlamento Galego para pedir unha explicación ao presidente da Fundación, que é o conselleiro de industria, e exixir unha rectificación na política lingüística deste entidade pública”.

“Lamentabelmente non é a primeira vez que se incumpre a lei a respecto da nosa lingua no concello da Estrada estando gobernado polo Partido Popular”, afirman os nacionalistas, “topónimos deturpados, sinais de tráfico en castelán, etc, son a norma nun concello que presume de ter un secretario xeral de política lingüística, Valentín García, pero que todo se queda aí, en presumir, porque os feitos falan por si sós”.